: ଏମ୍. ବିଜୟ କୁମାର

ମାଗଲେ କିଏଁ ହେନତେଇ

ନାଇ ଦେଇ ଦିଏ

ହରଲା ଅଧିକାରକେ

କିଏ ମାହାଲିଆ ନାଇ ଫିରାଏ

ଖୁଟ ବଗ ଲେଖେଁ ଜୁଗି

ମଗନିହା ଜେ ଭିକ୍ ମାଗମା

ହକ୍ ନୁହେଁ ସେ ଭିକ୍ କାହାର

ଦଜାଥୁ ନାଇ ମିଲେ

ଭିକ୍ ନୁହେଁ ସେ

ଆମର ପେଟର ଭୋକ

ଲଢ଼ି ଭିଡ଼ି ଛଡ଼ାଇ ଆନଲେ

ଆମର ହକ୍ ପାଏମା

ହକ୍ ରକତ ଇଜ୍ଜତ ମହତ

ସ୍ବାଭିମାନ ମାନ ସନମାନ

ଆଏ ସବୁ କିଛି

ସତ ସିଖଖାନେ ଗତି-ମୁକତି

ନୂଆ ଦିସା ପାରମୁ ରଚି

କେତେ ଦିନ ଆର୍ ଚୁପ୍ ରହେମା

ଛଡ଼ାଲା ହଁକ୍ ଛଡ଼େଇ ଆନମା

ଖାଏଲା ଭାତେ ଧୁଇଲ୍ ଝିଟା

ଆହାଲୋତ ନାଇ ଆଖିର କୁଟା

ଉପରେ ରାମ ରାମ ପେଟେ ପାପ

ଭଲଲୋକି ବିଲେଇ ତମେ କାଲାସାପ

ଉଡ଼ି ଆଏଲା କୁଆ

ଆମକେ ଶାସନ କରବା

ବାଘକେ ଟୁପା ଢାପି

ବିଲେଇ କେଁ ରଜା ହେବ

ଭିନ ଭିନ ହେଇ ଅଲଗେ

ଅଲଗେ ଏକଲା ମରୁଛୁ

ମରନ ଦସାକେ ଜାନିସୁନି

ଉପଭୋଗ କରୁଛୁ

ଆଦିବାସୀ ମରୁଛେ

ଜଙ୍ଗଲ ଜମିନ ପାଏନେ

ଦଲିତ ମରୁଛେ

ଘୁରନା ଭେଦ ଜେନେ

ଧରମ ବଦଲେଇ କିଏ ମରୁଛେ

ଦଁଗା ହନା କଟାନେ

ପଛୁଆ ମରୁଛେ

ପଛୁଆଲ ହେଇ ହେଲୁଆନେ

ଇ ମାଏଟର ଖୁଟ କଟା

ଲୋକ ଆମେ ସଭୁ

ଗୁମନା ହେଲେ ଭାଗଭାଗଥି ମରବୁ

ଜାଏତକେ ଛାଡ଼ ସମାଜଥି ଜୁଡ

ସଭ ବନ୍ଦନକେ ଛିଡ଼ରେ ଛିଡ଼

ସାମାଜିକ - ଅର୍ଥନୈତିକ

ମୁକତି ପାଏମା

ଆମର ହଁକ

ଛଡ଼ାଇ ଆନମା୤

ରେମନଁଡ଼ା, ସଇଁତଲା

ବଲାଙ୍ଗୀର - ୩୨, ଓଡ଼ିଶା

ଭ୍ରାମ୍ୟଭାଷ : ୭୯୭୮୭୮୪୧୩୦