: ସନ୍ତୋଷ ପଟ୍ଟନାୟକ

ବିଶ୍ବରେ ବିରଳ ଆମରି ଉତ୍କଳ

ଅଧୁନା ଓଡ଼ିଶା ଭୂଇଁ

ଆରାଧ୍ୟ ଦେବତା ଜଗତର କର୍ତ୍ତା

ଭକ୍ତମନ ଥାନ୍ତି ମୋହି୤

ବୈଷ୍ଣବର ସାଥେ ଶୈବ ଆଉ ଶାକ୍ତ

ସର୍ବଧର୍ମ ସମନ୍ବୟ

ସଦା ପ୍ରଚଳିତ ବିଶ୍ବେ ପ୍ରତିଷ୍ଠିତ

ପରମ୍ପରା ଲୋକନାଟ୍ୟ୤

କଟକେ ପାଟୁଆ, ଢେଙ୍କାନାଳେ ଝାମୁ

ଉଡ଼ା ପୂଜା ବାଲେଶ୍ବରେ

ଦଣ୍ଡନାଚ ନାମେ ଏକ ପରମ୍ପରା

ଖ୍ୟାତ ଅଟେ ଗଞ୍ଜାମରେ୤

ସବୁଠୁ ନିଆରା ଭକ୍ତିଭାବ ଭରା

ଗ୍ରୀଷ୍ମକାଳୀନ ଏ ପର୍ବ

କଳାରୁଦ୍ରମଣି ଭଜହେ ଧ୍ବନିରେ

ଦୁଃଖ ହୁଅଇ ଲାଘବ୤

ଆରାଧ୍ୟା ଦେବତା ଦଣ୍ଡକାଳୀ ମାତା

ଚମ୍ପାବର, ବେତ ଗୁଆ

ବାଦ୍ୟ ଢୋଲ ଘଣ୍ଟ ମହୁରୀ ଓ ଝାଞ୍ଜ

ମୁଖ୍ୟ ପାଟ ଦଣ୍ଡୁଆ୤

ମୁଖ୍ୟ ଭୋକ୍ତା ତେର ରହି ଉଜାଗର

ଦଣ୍ଡିତ ଷୋଳପ୍ରକାରେ

ସୁଆଙ୍ଗ ଷୋହଳ ମୁଖ୍ୟ ଆକର୍ଷଣ

ପରମ୍ପରା ଅନୁସାରେ୤

ବୀଣାକାର ଗୀତ ତେରଦିନ ଯାତ

ଦ୍ବିପହରେ ଧୁଳିଦଣ୍ଡ

ଆମ୍ବ, ଲିଆ, ଖଇ ନବାତକୁ ନେଇ

ପାଣିଦଣ୍ଡେ ସର୍ବେ ରୁଣ୍ଢ୤

ଚାଉଳ ଅରୁଆ ପ୍ରସାଦ ନିଆରା

ମୁଗଡାଲି ପରିବା ଗୋଟା

ହବିଷ୍ୟାନ୍ନ ସେଇ ଦଣ୍ଡୁଆଙ୍କ ପାଇଁ

ଅକଟା ପୁଣି ଅଫୁଟା୤

ସରଳ ଗ୍ରାମୀଣ ଜୀବନ ଦର୍ଶନ

କଥାବସ୍ତୁ କାହାଣୀରେ

ହାସ୍ୟରସ ସାଥେ ବହୁ ଉପଦେଶେ

ପ୍ରଦର୍ଶନ ସୁଆଙ୍ଗରେ୤

ଦଣ୍ଡକାଳୀ ବ୍ରତ ହୁଏ ଉଦ୍ଯାପିତ

ବିଷୁବ ସଂକ୍ରାନ୍ତି ଦିନ

ନବବର୍ଷ ଏଇ ଓଡ଼ିଆଙ୍କ ପାଇଁ

ହନୁମନ୍ତ ଜନ୍ମଦିନ୤

ଗଞ୍ଜାମ, ଓଡ଼ିଶା