: ଡା ସୌମ୍ୟରଞ୍ଜନ ମିଶ୍ର

ମାତୃମୃତ୍ୟୁ ଶିଶୁମୃତ୍ୟୁହାର

ତାଲିକାରେ ଓଡ଼ିଶାକୁ ପ୍ରଥମରେ ଦେଖି

ସ୍ବାସ୍ଥ୍ୟମନ୍ତ୍ରୀ ପକେଇଲେ ଡାକ

କେ ଅଛରେ,

ତୁରନ୍ତ ସମନ କର ସେକ୍ରେଟାରୀଙ୍କୁ

ହେବ ରୁଦ୍ଧଦ୍ବାର ବଇଠକ୤

ବଇଠକେ ମନ୍ତ୍ରୀଙ୍କର ଟେମ୍ପରକୁ ଦେଖି

ଆସ୍ତେ କରି ଚଷମାକୁ ଟେକି

ସେକ୍ରେଟାରୀ କହିଲେ -ବୃଥାରେ

ଆମ ଉପରେ କର କିଆଁ ରୋଷ?

ଆମେ ତ ନିରୀହ ସାର

ସବୁ ସେଇ ଡାକ୍ତରଙ୍କ ଦୋଷ୤

ଯେତେ ବଢ଼େଇଲେ ବି ଦରମା ଭତ୍ତା

ଡାକ୍ତର ଯାଉନାହାନ୍ତି ଗ୍ରାମାଞ୍ଚଳ ଆଡ଼େ

ସେଇଥିପାଇଁ କି ସାର

ମାତୃ ଓ ଶିଶୁମୃତ୍ୟୁହାର ହୁ ହୁ ବଢ଼େ୤

ମନ୍ତ୍ରୀ କହିଲେ - ଆଚ୍ଛା, ଏମନ୍ତ!

ଠିକ୍ ଅଛି, ଆଉ ଗଣ୍ଡେ ମେଡ଼ିକାଲ କଲେଜ ଖୋଲିବା

ଆମେ ଖୋଲି ନ ପାରିଲେ ପ୍ରାଇଭେଟ୍ କମ୍ପାନୀକୁ ଦେବା୤

ସେଇଥିରୁ ଶହ ଶହ ଡାକ୍ତର ଉତାରି

ପଠେଇବା କୋରାପୁଟ୍, ମାଲକାନଗିରି୤

ଡାକ୍ତର ହେଲେ ହାଉଯାଉ

ବାଧ୍ୟହୋଇ ଗ୍ରାମାଞ୍ଚଳ ଯିବେ

ସହି ନ ପାରିବେ କମ୍ପିଟିସନ ଦାଉ୤

ସେକ୍ରେଟାରୀ କହିଲେ - ସାର୍,

ଏଥିପାଇଁ ବହୁତ ସମୟ ଲାଗିବ;

ଅତି କମରେ ଛଅରୁ ଆଠବର୍ଷ ଯିବ୤

ଆପଣଙ୍କ କାର୍ଯ୍ୟକାଳ ସରି ଯାଇଥିବ ସାର୍‌

ମୃତ୍ୟୁହାର କଣ ଆଉ ଜଗିକି ବସିବ?

ସେଥିପାଇଁ ମୁଁ ରଖିଛି ଆଇଡ଼ିଆ ବୋମା;

ଆସନ୍ତା ଶିକ୍ଷାବର୍ଷରୁ

ଖୋଲିବା ଆମ ରାଜ୍ୟରେ ଡାକ୍ତରୀ ଡିପ୍ଲୋମା୤

ଯେତେସବୁ ମେଟ୍ରିକ୍ ଟପ୍ପର୍;

କହିଛନ୍ତି ଭବିଷ୍ୟତରେ ହେବାକୁ ଡାକ୍ତର

ସମସ୍ତଙ୍କୁ କରିଦେବା ଭର୍ତ୍ତି

ପ୍ଲସ୍ ଟୁରେ ବେଙ୍ଗକାଟି

ସେମାନେ ଅଧିକଟା ବା କଣ ଶିଖୁଛନ୍ତି?

ମନ୍ତ୍ରୀ କହିଲେ - ହଁ ଠିକ୍ କଥା ଯେ

ବିଶେଷଜ୍ଞ ଡାକ୍ତର ନ ହେଲେ ଲାଭ ନାହିଁ କିଛି

ଜର ଝାଡ଼ା ଉପଚାର ଛଡ଼ା

ସିମ୍ପିଲ୍ ଡାକ୍ତର କଣ ମାରିପାରେ ମାଛି?

ଆଉ କିଛି ଅଛି କି ଉପାୟ;

ବିଶେଷଜ୍ଞ ଡାକ୍ତରଙ୍କ ସଂଖ୍ୟା କେମିତି ବଢ଼ିବ

ନିର୍ଭୟରେ ଖୋଲିକରି କୁହ୤

ସେକ୍ରେଟାରୀ କହିଲେ - ସାର୍

ରାଜ୍ୟରେ ଅଛନ୍ତି ଯେତେ ବେକାରୀ ଇଞ୍ଜିନିୟର୍

ସେମାନେ ହୋଇପାରିବେ ନିଶ୍ଚେ ବିଶେଷଜ୍ଞ

ଖାଲିଟିକେ ସର୍ଟ୍ କୋର୍ସ୍ ଟ୍ରେନିଂ ଦରକାର୤

ସିଭିଲ ବାଲାଏ ହେବେ ଶିଶୁ ବିଶେଷଜ୍ଞ

ଆର୍କିଟେକ୍ ବାଲାଙ୍କୁ ଦେବା ସ୍ତ୍ରୀ ଆଉ ପ୍ରସୂତୀ ବିଭାଗ

ହାଇଡ୍ରୋ ଟେକ୍ନୋଲୋଜୀଙ୍କୁ କିଡ଼ନୀ ଲିଭର

ଟେଲି କମ୍ୟୁନିକେସନଙ୍କୁ ମାନସିକ ରୋଗ୤

ଇଲେକ୍ଟ୍ରୋନିକ୍ସ୍ ଇଞ୍ଜିନିୟର୍

ବଢ଼ିଆ କରିବେ ସାର୍ ସ୍ନାୟୁର ସର୍ଜରୀ

ଅଟୋମୋବାଇଲ୍ ବାଲା ବସିଥିବେ ହୃତପିଣ୍ଡ ଧରି୤

ମେକାନିକାଲ୍ ଇଞ୍ଜିନିୟର୍

ଅର୍ଥୋପେଡ଼ିକ୍ ଚିକିତ୍ସା କରିବ;

ଇଞ୍ଜିନିୟରିଂ ପରେ ଯିଏ ଏମବିଏ କରିଥିବ

ଏ ସବୁ ବିଶେଷଜ୍ଞଙ୍କୁ ସିଏ ସମ୍ଭାଳିବ୤

ତେଣୁ ସାର,

ଠିକାରେ ସେଇମାନଙ୍କୁ ଦିଅନ୍ତୁ ନିଯୁକ୍ତି

କାରଣ, ଯେତେକ ଇଞ୍ଜିନିୟର

ସମସ୍ତେ ପ୍ଲସ୍ ଟୁରେ ବିଜ୍ଞାନ ପଢ଼ିଛନ୍ତି୤

ସବୁ ଶୁଣିସାରି ମନ୍ତ୍ରୀ

ସେକ୍ରେଟାରୀଙ୍କୁ ଆଉ ଟିକେ ପାଖକୁ ଡାକିଲେ

ଫୁସ୍ ଫୁସ୍ କରି ତାଙ୍କ କାନରେ କହିଲେ,

ହେଲା ଯେ, ଗୋଟେ କଥା ବାକି ରହିଗଲା

କହିଲନି ତ ଯୌନରୋଗ ବିଶେଷଜ୍ଞ

ପଦବୀଟା କାହାକୁ ମିଳିଲା୤

ସେକ୍ରେଟାର୍ ସ୍ମିତହାସ୍ୟମାରି

କହିଲେ - ସାର୍, କମ୍ପ୍ୟୁଟର୍ ଇଞ୍ଜିନିୟର୍

ଛଟେଇ ହେଇ ଯାହାଙ୍କ ଯାଇଛି ଚାକିରୀ୤

ସେଇମାନେ ଯୌନରୋଗ ବିଶେଷଜ୍ଞ ହେବେ;

କମ୍ପ୍ୟୁଟର ଛବିକୁ ଦେଖେଇ

ଯୌନରୋଗ ଚିକିତ୍ସା କରିବେ୤

ସେକ୍ରେଟାରୀଙ୍କ କଥା ମନ୍ତ୍ରୀ ହେଲେ ପ୍ରୀତ;

କହିଲେ - ଏ ବାବଦରେ ଫାଇଲି ପୁଟ୍ ଅପ୍ କରି

ମୋ ପାଖକୁ ପଠାଅ ତୁରନ୍ତ୤

ମଧ୍ୟଖଣ୍ଡୀ, ଶ୍ରୀବଳଦେବ ଜୀୟୁ, କେନ୍ଦ୍ରାପଡ଼ା

ଓଡ଼ିଶା