: ଡା ସୌମ୍ୟରଞ୍ଜନ ମିଶ୍ର

ମାର୍ଚ୍ଚ ମାସଟା ସବୁ ଚାକିରୀଆଙ୍କ ପାଇଁ ବଡ଼ ଅଡୁଆ୤ ସମସ୍ତେ ବ୍ୟସ୍ତ୤ କେତେକ କାର୍ଯ୍ୟାଳୟରେ ତ ଫେବୃଆରୀରୁ ବ୍ୟସ୍ତତା ଆରମ୍ଭ ହୋଇଯାଏ, ଆଉ ସରେ ଅପ୍ରେଲ ନହେଲେ ମଇ ମାସର ପ୍ରଥମ ସପ୍ତାହ ବେଳକୁ୤ ସୁଦର୍ଶନ ବି ସେଥିରୁ କେମିତି ବାଦ ଯିବ? ଅତଏବ, ବହୁଦିନ ହେଲା ଦେଖା ହୋଇନଥିଲା ତା’ ସହିତ୤ କିନ୍ତୁ ହ୍ବାଟ୍‌ସଆପ୍‌ରେ ବରାବର ଯୋଗାଯୋଗ ଚାଲୁ ରହିଥାଏ୤ ବହୁତ ଦିନ ହେଲା ଦେଖା ହୋଇନି, ମନ ଭଲ ଲାଗୁନି କହିବାରୁ କିଛି ସମୟ ପାଇଁହେଲେ ମଧ୍ୟ ସମୟ ବାହାର କରି ସେ ଆସିଲା୤ ସେ ଆସିଛି ମାନେ, କିଛି ଗୋଟାଏ କଥା ଚର୍ଚ୍ଚା ହେବା ଥୟ୤ ଦେଖା ହେଉ ହେଉ କହି ପକାଇଲା - କ’ଣ ଭାଇନା, ରାଜ୍ୟସଭା ଆଡ଼େ ଯାଉଛ ନା କ’ଣ ଶୁଣିଲି୤ ମୁଁ ଜାଣେ ସେ ବିଦ୍ରୁପ କରୁଛି୤ ତଥାପି କହିଲି, ମିଶ୍ର ସାଙ୍ଗିଆଧାରୀ ନୁହେଁ, ଅନ୍ୟ ଏକ ସାଙ୍ଗିଆଧାରୀ ବ୍ୟକ୍ତି ଯାଉଛନ୍ତି୤ ଆମ୍ଭେ ଅନୁସ୍ବାର, ବିସର୍ଗ, ଚନ୍ଦ୍ରବିନ୍ଦୁ ଶାସ୍ତ୍ରୀୟ ମାନ୍ୟତା ଅନୁସାରେ ଲଗାଉ୤ ତେଣୁ ଆମ୍ଭେ ରାଜନୀତି କଲେ ବୁଡ଼ିଯିବୁ, ନୋହିଲେ ରାଜନୀତି ବୁଡ଼ିଯିବ୤ ରାଜନୀତି, ରାଇଜରୁ ଆରମ୍ଭ ହୋଇ କେତେବେଳେ ସାହିତ୍ୟ ଆଡ଼କୁ ପଶିଗଲା ଜଣା ପଡ଼ିଲା ନାହିଁ୤ ରାଜନୀତି କେଉଁଠି ବି ପଶି ଯାଇପାରେ୤ କେହି ଜଣେ ଜ୍ଞାନୀ କହିଥିଲେ - ଯେଉଁ ଯାଗାକୁ ନଯାଏ ରବି, ସେଠି ପହଞ୍ଚିପାରଇ କବି୤ କିନ୍ତୁ ଆମ୍ଭେ କହୁଛୁ, ଯେଉଁ ଯାଗାକୁ କବି ମଧ୍ୟ ଯାଇ ପାରନ୍ତି ନାହିଁ, ସେହି ଯାଗାରେ ରାଜନୀତି ଅନାୟାସରେ ପହଞ୍ଚିଯାଇ ପାରେ୤ ଆମ୍ଭ ସହ ଏକମତ ହେଉନଥିବା ପାଠକେ ଆମ୍ଭ ସହ ବାଦି ପକାଇ ପାରନ୍ତି୤

ଛାଡ଼ନ୍ତୁ ସେ କଥା୤ ସୁଦର୍ଶନ ବହୁତ ଖୁସିଥିଲା ଯେ, ସରକାର ଓଡ଼ିଆ ଭାଷାର ଉନ୍ନତି ପାଇଁ ବହୁତ କିଛି କରିବାକୁ ଯାଉଛନ୍ତି୤ ତେଣୁ ଗୋଟି ଗୋଟି କରି ମୋ ଆଗରେ ସରକାରଙ୍କର ଘୋଷଣା ସବୁ ବଖାଣି ଗଲା, ଯଦିଓ ମୁଁ ମଧ୍ୟ ଏ ସବୁ ଖବର ଆଗରୁ ଶୁଣିଥିଲି୤ ସବୁ ଶୁଣିଲା ପରେ ମୁଁ କହିଲି - ସରକାର ଯଦି ଭାଷା ପାଇଁ ଏତେ କହୁଛନ୍ତି, ତେବେ ପ୍ରତିବର୍ଷ ସମ୍ମିଳନୀ ହେବା ଦରକାର୤ କିନ୍ତୁ ତାହା ଉପାନ୍ତ ଅଞ୍ଚଳରେ ହେବା ଆବଶ୍ୟକ୤ ଓଡ଼ିଆ ବିଷୟରେ ନୁହେଁ ଓଡ଼ିଆ ମାଧ୍ୟମରେ ପାଠପଢୁଥିବା ଛାତ୍ରଛାତ୍ରୀଙ୍କର ଦେୟ ଛାଡ଼ ହେବା ଦରକାର୤ ଖାଲି ଦେୟ ଛାଡ଼ କରିଦେଲେ ତ ହେବନି, ସରକାରୀ ଓ ବେସରକାରୀ ଚାକିରୀରେ ବି ସ୍ଥାନ ସଂରକ୍ଷଣ କରିବା ଦରକାର ଓ ଜରୂରୀ ମଧ୍ୟ୤

ଠିକ୍ କଥା କହିଛ ଭାଇନା୤ ତା’ହେଲେ ତୁମ ପରାମର୍ଶ ଗୁଡ଼ା ଲେଖିକି ସରକାରଙ୍କ ପାଖକୁ ପଠାଉନ? ଆଗ୍ରହର ସହିତ କହିଲା ସୁଦର୍ଶନ୤ ପଠାନ୍ତି ଯେ, ହେଲେ ସଦ୍ୟ ପ୍ରସାରିତ ନ୍ୟୁଜ ଫ୍ୟୁଜ କାର୍ଯ୍ୟକ୍ରମରେ ନେତାମାନେ ଓଡ଼ିଆ ବର୍ଣ୍ଣମାଳା ଜ୍ଞାନ ଦେଖି ସାହାସ ହେଉନି୤ ହାତକୁ କିଏ ଯେମିତି ପଛରୁ ଟାଣି ଧରୁଛି୤ ଓଡ଼ିଆରେ ଲେଖା ଚିଠି ସେମାନେ ପଢ଼ି ପାରିବେ କି ନାହିଁ, ସନ୍ଦେହ୤ ଦୀର୍ଘଶ୍ବାସଟିଏ ପକାଇଲି ମୁଁ୤

ନେତାମାନେ ପରା ଭାଷା କମିଶନର ମୁଖ୍ୟ କାର୍ଯ୍ୟାଳୟ କେଉଁଠାରେ ହେବ ସେ ନେଇ ବଳ କଷାକଷି କଲେଣି୤ ଆଉ ଚିଠି ପଢ଼ି ପାରିବେନି କଣ କହୁଛ? ପଶ୍ଚିମା ନେତାମାନେ ବୋଲୁଛନ୍ ଯେ ମୁଖ୍ୟ କାର୍ଯ୍ୟାଳୟଟା ଆମର୍ ଇଆଡ଼େ ହେଉ୤ ଦକ୍ଷିଣୀ ନେତାଏ ବି ଛାଡ଼ିବା ଲୋକ ନୁହନ୍ତି୤ ତାଙ୍କେ ବି ଫୁଲ୍ ଦମରେ ଅଛନ୍ତି୤ ଇଆଡ଼େ ମଝିରୁ ସ୍ବର ଶୁଭିଲାଣି - ହେରା, ଅଫିସଟା ଆମ ଆଡ଼େ କରୁନ କିଆଁ? ଆଉ ବାଲେଶରିଆ ସମସ୍ତକୁ ଗୁଡ଼େ ଗୁଡ଼େ ଜଗିଛନ୍ତି୤

ମୁଁ ହସୁ ହସୁ ରହିଗଲି୤ ଦେଖିଲୁ ଭାଷା ଭିତରେ ରାଜନୀତିଟା ପୁଣି କେମିତି ପୁରେଇ ଦେଲୁ୤ ଏଥର ଆମେ ଦୁଇଜଣ ମନଖୋଲା ହସ ହସିଲୁ୤

ମଧ୍ୟଖଣ୍ଡୀ, ଶ୍ରୀ ବଳଦେବଜୀୟୁ, କେନ୍ଦ୍ରାପଡ଼ା, ୭୫୪୨୧୨, ଓଡ଼ିଶା

ଭ୍ରାମ୍ୟଭାଷ : ୯୯୩୭୩୭୪୩୪୨, ଇମେଲ୍ : dr.srmishra@gmail.com