: ରମାକାନ୍ତ ମିଶ୍ର

ମାର୍ଚ୍ଚ ୪ ତାରିଖ ଜାତୀୟ ସୁରକ୍ଷା ଦିବସ ଉପଲକ୍ଷେ

ସବୁଜ ତ୍ରିକୋଣ କ'ଣ ?

ସବୁଜ ତ୍ରିକୋଣ ଅର୍ଥାତ ସୁରକ୍ଷା ତ୍ରିକୋଣ ଏବଂ ଏହା ସୁରକ୍ଷାର ପ୍ରତୀକ୤ ଦୈନନ୍ଦିନ ଜୀବନର ମୁଖ୍ୟ ଆବଶ୍ୟକ ବିଷୟ ଗୁଡ଼ିକୁ ଆମେ ପ୍ରତୀକ ସାହାଯ୍ୟରେ ମନେ ରଖିବାକୁ ଚେଷ୍ଟା କରିଥାଉ୤ ସୁରକ୍ଷା ଜୀବନର ଅପରିହାର୍ଯ୍ୟ ଅଙ୍ଗ୤ ଜନ୍ମ ଠାରୁ ମୃତ୍ୟୁ ମଧ୍ୟରେ ଜୀବନର ପ୍ରତି ପଦକ୍ଷେପରେ ସୁରକ୍ଷାର ଆବଶ୍ୟକତା ରହିଅଛି୤ ଏଣୁ କରି ସୁରକ୍ଷା ବିଷୟରେ ଆଲୋଚନା କରିବା ସର୍ବାଦୌ ଆବଶ୍ୟକ୤ ରାସ୍ତାରେ ବିଭିନ୍ନ ଗୋଳେଇ ଛକ ମାନଙ୍କରେ ଆଜିକାଲି ଯାନ-ବାହାନ ନିୟନ୍ତ୍ରଣ କରିବା ପାଇଁ ମୁଖ୍ୟତଃ ଦୁଇଟି ରଙ୍ଗର ଚିହ୍ନ ବିଶେଷ ଭାବରେ ପ୍ରୟୋଗ ହୋଇଥାଏ୤ ପ୍ରଥମଟି ହେଲା ସବୁଜ ତ୍ରିକୋଣ ଅର୍ଥାତ ଲାଇନ କ୍ଲିୟର ବା ଯାଇ ପାରନ୍ତି୤ ଆଉ ଦ୍ୱିତୀୟଟି ହେଲା ଲାଲ ତ୍ରିକୋଣ ଅର୍ଥାତ ରହିଯାନ୍ତୁ ବା ଆଗରେ ବିପଦ ଅଛି୤ ଏଣୁକରି ସବୁଜ ତ୍ରିକୋଣ ବର୍ତ୍ତମାନ ସୁରକ୍ଷା ତ୍ରିକୋଣ ଭାବରେ ସର୍ବଜନ ଆଦୃତ ହୋଇ ସାରିଛି୤

ବିଷୟଟିକୁ ବିଷଦ ଭାବରେ ଆଲୋଚନା କରିବା ପୂର୍ବରୁ ସୁରକ୍ଷାରେ ବିଭିନ୍ନ ରଙ୍ଗର ଭୂମିକା ସମ୍ବନ୍ଧରେ କିଞ୍ଚିତ ଆଲୋଚନା କରାଯାଉ୤ ସବୁଜ ରଙ୍ଗ ସୁରକ୍ଷା ପାଇଁ କାହିଁକି ବ୍ୟବହାର କରାଯାଏ ତା ସମ୍ବନ୍ଧରେ ମଧ୍ୟ ସାମାନ୍ୟ ବିଚାର କରାଯାଉ୤ ଦୁର୍ଘଟଣା ନିବାରଣ ପାଇଁ, ବିପଦକୁ ଚିହ୍ନାଇ ଦେବା ପାଇଁ, ସାବଧାନ ହେବା ପାଇଁ, ଖୋଲା ଯନ୍ତ୍ରକୁ ଚିହ୍ନିତ କରିବା ପାଇଁ ନିର୍ଦ୍ଦିଷ୍ଟ ରଙ୍ଗର ବ୍ୟବହାର କରାଯାଇଥାଏ I

ଲାଲ ରଙ୍ଗ ବିଭିନ୍ନ ପ୍ରକାରର ଅଗ୍ନି ନିର୍ବାପକ ଯନ୍ତ୍ର ମାନଙ୍କରେ ବ୍ୟବହୃତ ହୁଏ୤ ହଳଦିଆ ରଙ୍ଗ ସାଧାରଣତଃ କାରଖାନା ଭିତରେ ଥିବା ଗତିଶୀଳ ପରିବହନ ଯାନ ମାନଙ୍କରେ ବ୍ୟବହୃତ ହୁଏ୤ ନୀଳ ରଙ୍ଗକୁ ପାଣିଟାଙ୍କି ଏବଂ ସିଢି ଇତ୍ୟାଦିରେ ବ୍ୟବହାର କରାଯାଏ୤ କଳା ଆଉ ଧଳା ରଙ୍ଗକୁ ହଳଦିଆ ରଙ୍ଗର ପରିପୂରକ ଭାବରେ ବ୍ୟବହାର କରାଯାଏ୤ ତା’ଛଡ଼ା ରାସ୍ତାମାନଙ୍କରେ ଜେବ୍ରା କ୍ରସିଂରେ ମଧ୍ୟ କଳା ଆଉ ଧଳା ରଙ୍ଗର ବ୍ୟବହାର ହୁଏ୤ ରଙ୍ଗ ମାନଙ୍କର ସଂକ୍ଷିପ୍ତ ପରିଚୟ ଦେବାର ଉଦ୍ଦେଶ୍ୟ ହେଲା, ଏହା ସମସ୍ତଙ୍କର ଜାଣିବା ଦରକାର୤ ସେହିପରି ସବୁଜ ରଙ୍ଗ ଯେ କୌଣସି ସୁରକ୍ଷା ଉପକରଣର ପ୍ରଚ୍ଛଦପଟ ଭାବରେ ବ୍ୟବହୃତ ହୁଏ୤ ସବୁଜ ରଙ୍ଗ ଜୀବନର ପ୍ରତୀକ୤ ଯେତେ ସମୟ ପର୍ଯ୍ୟନ୍ତ ଗଛର ପତ୍ରମାନେ ସବୁଜ ଅଛନ୍ତି ଧରାଯାଏ ସେଥିରେ ଜୀବନ ଅଛି୤ ପତ୍ରର ଜୀବନ ସରିଗଲେ ତାର ରଙ୍ଗ ଆଉ ସବୁଜ ନ ରହି ହଳଦିଆ ହୋଇଯାଏ ଓ ପରବର୍ତ୍ତୀ କାଳରେ ଶୁଖି ଯାଏ୤ ସବୁଜ ରଙ୍ଗ ଶାନ୍ତିର ପ୍ରତୀକ ମଧ୍ୟ୤ ଏହା ଚକ୍ଷୁକୁ ଆନନ୍ଦ ଦିଏ୤ ଏହି କାରଣରୁ ହିଁ ସବୁଜ ରଙ୍ଗକୁ ସୁରକ୍ଷାର ପ୍ରତୀକ ଭାବରେ ମଧ୍ୟ ଗ୍ରହଣ କରା ଯାଇଅଛି୤

ସବୁଜ ତ୍ରିକୋଣ ଗୋଟିଏ ସମବାହୁ ତ୍ରିଭୁଜ୤ ଏହାର ତିନୋଟି ବାହୁର ନିର୍ଦ୍ଦିଷ୍ଟ ଅର୍ଥ ରହିଅଛି୤ ପ୍ରଥମ ବାହୁର ଅର୍ଥ ହେଲା ଇଂଜିନିୟରିଂ ବା ଯନ୍ତ୍ରବିଦ୍ୟା୤ ଦ୍ବିତୀୟ ବାହୁର ଅର୍ଥ ହେଲା ଏଡୁକେସନ ବା ଶିକ୍ଷା ଏବଂ ତୃତୀୟ ବାହୁର ଅର୍ଥ ହେଲା ଏନଫୋର୍ସମେଣ୍ଟ ବା ପ୍ରବର୍ତ୍ତନ କରିବା୤ ଏହି ତିନୋଟି ଅର୍ଥର ସମାବେଶରେ ସମ୍ପୂର୍ଣ୍ଣ ସୁରକ୍ଷା ପଦ୍ଧତି ପର୍ଯ୍ୟବେସିତ୤ ବର୍ତ୍ତମାନ ଆମେ ଏହି ତିନୋଟି ଅର୍ଥକୁ ବିଷଦ ଭାବରେ ବିଶ୍ଲେଷଣ କରିବା୤

୧ମ ବାହୁ - ଇଂଜିନିୟରିଂ ଅର୍ଥାତ ଯନ୍ତ୍ର ବିଦ୍ୟା

୨ୟ ବାହୁ - ଏଡୁକେସନ ଅର୍ଥାତ ଶିକ୍ଷା

୩ୟ ବାହୁ - ଏନଫୋର୍ସମେଣ୍ଟ ଅର୍ଥାତ ପ୍ରବର୍ତ୍ତନ କରିବା

ଯଦିଓ ସୁରକ୍ଷା ଏକ ଜନ୍ମଗତ ଚେତନା ଏବଂ ଜନ୍ମଠାରୁ ମୃତ୍ୟୁ ପର୍ଯ୍ୟନ୍ତ ପ୍ରତି ପଦକ୍ଷେପରେ ସୁରକ୍ଷାର ଆବଶ୍ୟକତା ରହିଅଛି, କିନ୍ତୁ ଏହାର ପ୍ରକୃତ ମହତ୍ୱ ଉପଲବ୍ଧି କରାଯାଇଥିଲା ଔଦ୍ୟୋଗୀକରଣ ପରେ୤ ସଂସାରର ଶିଳ୍ପ ଇତିହାସ ମାତ୍ର ୩୦୦ ବର୍ଷର ପୁରାତନ୤ ପୁଣି ଭାରତରେ ଏହା ମାତ୍ର ୧୫୦ ବର୍ଷ ପୁରାତନ୤ ଯେତେବେଳେ ଶିଳ୍ପମାନଙ୍କର ଦ୍ରୁତ ବିକାଶ ହେଲା, ପରବର୍ତ୍ତୀ କାଳରେ ଦେଖାଗଲା ଯେ ଯଦିଓ ଶିଳ୍ପ ଶ୍ରମିକମାନଙ୍କର ଜୀବନ ମାନରେ ଉନ୍ନତି ହେଉଛି, କିନ୍ତୁ ଅଯଥା ଅନେକ ଶ୍ରମିକ ଦୁର୍ଘଟଣାର ଶିକାର ହୋଇ ସମାଜରେ ପଙ୍ଗୁ ପରି ବଞ୍ଚି ରହିବାକୁ ବାଧ୍ୟ ହେଉଛନ୍ତି୤ ଧିରେ ଧିରେ ଯନ୍ତ୍ର ସଭ୍ୟତାର ବିକାଶ ସଙ୍ଗେ ସଙ୍ଗେ ଯନ୍ତ୍ରୀମାନେ ଯନ୍ତ୍ର ଗୁଡ଼ିକର ଗଠନରେ ସୁଧାର କରିବାରେ ଲାଗି ପଡ଼ିଲେ୤ ଅର୍ଥାତ ଯନ୍ତ୍ରର ବିପଦପୂର୍ଣ୍ଣ ସ୍ଥାନମାନଙ୍କୁ ଏପରି ଭାବରେ ଢାଙ୍କି ରଖିବାକୁ ଚେଷ୍ଟା କଲେ ଯେ କେହି ଯେପରି ସେହି ବିପଦପୂର୍ଣ୍ଣ ସ୍ଥାନମାନଙ୍କର ସିଧା ସଳଖ ସଂସ୍ପର୍ଶରେ ନ ଆସେ୤ ଏହାହିଁ ହେଉଛି ଯାନ୍ତ୍ରିକ ବିଦ୍ୟା ଦ୍ୱାରା ଯନ୍ତ୍ରର ଉତ୍ତୋରତ୍ତର ଉନ୍ନତି କରିବାର ପ୍ରଣାଳୀ୤ ଏହି ପ୍ରଣାଳୀ ଅହରହ କାମ କରୁଛି୤ ଏହା ଫଳରେ ଆମେ ନିତ୍ୟ ନୂତନ ପରିମାର୍ଜ୍ଜିତ ଯନ୍ତ୍ର ଗୁଡିକ ବ୍ୟବହାର କରିବାର ସୁଯୋଗ ପାଇଁ ପାରୁଛୁ୤ ସବୁଜ ତ୍ରିକୋଣର ପ୍ରଥମ ବାହୁଟି ତେଣୁକରି ଯନ୍ତ୍ର ବିଦ୍ୟାକୁ ବୁଝାଏ, ଅର୍ଥାତ ଯନ୍ତ୍ର ବିଦ୍ୟା ଦ୍ୱାରା, କାରିଗରୀ କୌଶଳ ଦ୍ୱାରା ଯନ୍ତ୍ରକୁ ଏପରି ଭାବରେ ଗଠନ କରିବା ଯାହାଦ୍ୱାରା ସେଥିରେ କାମ କରୁଥିବା ଶ୍ରମିକ ନିଜେ ନିଜେ ସୁରକ୍ଷିତ ହୋଇ ରହିବ I ଆପଣ ମାନେ ସମସ୍ତେ ଜାଣିଥିବେ ଆଜି ଠାରୁ ୫୦ ବର୍ଷ ପୂର୍ବେ ଯେଉଁ ଟେବୁଲ ଫ୍ୟାନ ଗୁଡିକ ତିଆରି ହେଉଥିଲା ତାର ତୀବ୍ର ବେଗରେ ଘୁରୁଥିବା ବ୍ଲେଡ ଚାରିକଡେ ଆଜି ଭଳି ଛୋଟ ଜାଲି ଦିଆ ଯାଉ ନ ଥିଲା, ଫଳରେ ବ୍ୟକ୍ତି ବିଶେଷଙ୍କ ଅସାବଧାନତା ହେତୁ ହାତ ବା ଗୋଡ଼ କାଟି ଯାଉଥିଲା I କିନ୍ତୁ ଏବେକାର ନୂତନ ଇଲେକ୍ଟ୍ରିକ ଟେବୁଲ ଫ୍ୟାନ ର ବ୍ଲେଡ ଚାରି ପାଖେ ଏପରି ଜାଲିର ବ୍ୟବସ୍ଥା କରାଯାଇଛି ଯାହା ଫଳରେ କେହି ଇଛା କରି ମଧ୍ୟ ତା ଭିତରକୁ ଆଙ୍ଗୁଠି ପୁରାଇ ପାରିବେ ନାହିଁ I ଏହାହିଁ ହେଉଛି ଯନ୍ତ୍ର ବିଦ୍ୟା ଦ୍ୱାରା ସୁରକ୍ଷିତ ହୋଇ ରହିବାର ଗୋଟିଏ ଉଦାହରଣ I ଅଧୁନା ଯନ୍ତ୍ରୀ ମାନେ ବିଭିନ୍ନ ଯନ୍ତ୍ରର ବିପଦ ପୂର୍ଣ୍ଣ ସ୍ଥାନ ମାନଙ୍କୁ ସୁରକ୍ଷିତ କରିବା ପାଇଁ ଅହରହ ଚେଷ୍ଟିତ ଅଛନ୍ତି I

ସବୁଜ ତ୍ରିକୋଣର ଦ୍ବିତୀୟ ବାହୁଟି ହେଲା ଏଡୁକେସନ ବା ଶିକ୍ଷା I ଶିକ୍ଷା ହେଉଛି ପ୍ରତ୍ୟେକ ସଫଳତାର ମୂଳ I ଶିକ୍ଷାର ବିକାଶରେ ହିଁ ବ୍ୟକ୍ତି ବିଶେଷଙ୍କ ଏବଂ ପରବର୍ତ୍ତୀ କାଳରେ ସମାଜର ଉନ୍ନତି ହୋଇ ଥାଏ I ଶିକ୍ଷା ହିଁ ମଣିଷକୁ ଯେ କୌଣସି ଇତର ପ୍ରାଣୀଠାରୁ ଭିନ୍ନ କରିଥାଏ I ଆମ୍ଭେମାନେ ସଦା ସର୍ବଦା ଶିକ୍ଷା ଉପରେ ଜୋର ଦେଇଥାଉ କାରଣ ଶିକ୍ଷା ମାଧ୍ୟମରେ ହିଁ ମନୁଷ୍ୟ ଯେ କୌଣସି ସମସ୍ୟାର ଉପଯୁକ୍ତ ସମାଧାନ କରିବାର ପାଠ ଖୋଜି ପାଇଥାଏ I ସୁରକ୍ଷା ଏକ ଜନ୍ମଗତ ଚେତନା ଏବଂ ଏହା ଏକ ବ୍ୟକ୍ତିଗତ ଚେତନା ମଧ୍ୟ I କିନ୍ତୁ ତା’ ସତ୍ତ୍ୱେ ଆମେ ପ୍ରତିଦିନ ସୁରକ୍ଷା ବିଷୟରେ ଆଲୋଚନା କରିବା ପାଇଁ, ସୁରକ୍ଷା ଶିକ୍ଷା କରିବା ପାଇଁ ସମସ୍ତଙ୍କୁ ଆଗ୍ରହIନ୍ୱିତ କରିଥାଉ I କାରଣ ପ୍ରତିଦିନ ଆଲୋଚନା କଲେ, ସୁରକ୍ଷା ଶିକ୍ଷା କଲେ ଏହା ଆମର ଈଶ୍ୱର ପ୍ରଦତ୍ତ ଚେତନାକୁ ଆହୁରି ବିକଶିତ କରିଥାଏ I ସୁରକ୍ଷା ଯେପରି ଗୋଟିଏ ଚେତନା ସେହିପରି ଖାମଖିଆଲି ଭାବ ଅନ୍ୟ ଏକ ଚେତନା, ଏହା ମଧ୍ୟ ପ୍ରତ୍ୟେକଙ୍କୁ ଜନ୍ମଗତ ଭାବରେ ମିଳିଥାଏ I ସୁରକ୍ଷା ଶିକ୍ଷା ଓ ଆଲୋଚନା ମାଧ୍ୟମରେ ଆମେ ଏହି ‘ଖାମଖିଆଲି’ ଭାବକୁ କମାଇ ଦେଇ ‘ସୁରକ୍ଷା’ ଭାବନାକୁ ବିକାଶ କରିବା ପାଇଁ ଚେଷ୍ଟା କରିଥାଉ I ଏହି କାରଣରୁ ସୁରକ୍ଷା ଶିକ୍ଷାର ଯଥେଷ୍ଟ ମହତ୍ୱ ରହିଅଛି I ସର୍ବଶେଷ କାରଖାନା ଆଇନରେ ଏହି ସୁରକ୍ଷା ଶିକ୍ଷା ଉପରେ ବିଶେଷ ଜୋର ଦିଆ ଯାଇଅଛି I କାରଖାନା ମାନଙ୍କରେ ସୁରକ୍ଷା ଶିକ୍ଷାକୁ ବାଧ୍ୟତାମୂଳକ କରାଯାଇଅଛି I କାରଣ ବର୍ତ୍ତମାନ ଆଧୁନିକ ଯନ୍ତ୍ର ମାନଙ୍କରେ ଯେଉଁ ମାନେ କାମ କରିବେ ଏବଂ ଉତ୍ପାଦନ କରିବେ ସେମାନଙ୍କ ଶିକ୍ଷାଗତ ଯୋଗ୍ୟତା ମଧ୍ୟରେ ସୁରକ୍ଷା ଶିକ୍ଷାର ମଧ୍ୟ ଯଥେଷ୍ଟ ଆବଶ୍ୟକତା ରହିଅଛି, ଏ କଥା ସରକାରଙ୍କ ଠାରୁ ଆରମ୍ଭକରି ସାଧରଣ ମଣିଷ ପର୍ଯ୍ୟନ୍ତ ସମସ୍ତେ ବୁଝିବାକୁ ସକ୍ଷମ ହୋଇ ପାରିଛନ୍ତି I

ସବୁଜ ତ୍ରିକୋଣର ତୃତୀୟ ବାହୁଟିର ଅର୍ଥ ହେଲା କଡାକଡି ଭାବରେ ସୁରକ୍ଷାକୁ ପ୍ରବର୍ତ୍ତନ କରିବା I ଆମେ ପୂର୍ବରୁ ଆଲୋଚନା କରିଛୁ ଯେ ମଣିଷ ମାତ୍ରକେ ଶିକ୍ଷିତ ହେଉ ବା ଅଶିକ୍ଷିତ, ତାଙ୍କ ମନରେ କିଛି ନ କିଛି ଖାମଖିଆଲି ଭାବ ରହିଥାଏ I ଫଳରେ ଜାଣତରେ ବା ଅଜାଣତରେ ମଣିଷ ବେଳେ ବେଳେ ବିପଦ ପ୍ରତି ସଚେତନ ହୋଇ ପାରେ ନାହିଁ ଏବଂ ଦୁର୍ଘଟଣାର ଶିକାର ହୁଏ I ଦୁର୍ଘଟଣାର ନିବାରଣ ପାଇଁ ଯନ୍ତ୍ର ବିଦ୍ୟା ଓ ସୁରକ୍ଷା ଶିକ୍ଷାର ଯେପରି ଆବଶ୍ୟକତା ରହିଛି, ସୁରକ୍ଷା ନୀତି-ନିୟମକୁ କଡାକଡି ଭାବରେ କାର୍ଯ୍ୟକାରୀ କରିବାର ମଧ୍ୟ ସେହିପରି ଆବଶ୍ୟକତା ରହିଅଛି I ସବୁ ଭଲ କଥାକୁ ସମସ୍ତେ କେବେହେଲେ ଗ୍ରହଣ କରନ୍ତି ନାହିଁ I ଅନେକେ ଜାଣିଶୁଣି ସୁରକ୍ଷା ନିୟମର ବହିର୍ଭୁତ କାର୍ଯ୍ୟ କରନ୍ତି I ଏ ପ୍ରକାର ଖାଖୟାଲୀ ଭାବର ବିନାଶ ପାଇଁ ଆମକୁ ଦରକାର ପଡ଼ିଲେ ଦଣ୍ଡର ବ୍ୟବସ୍ଥା ମଧ୍ୟ କରିବାକୁ ହେବ I ନିୟମ ପ୍ରତି ଭୟ ଥିଲେହିଁ ତାକୁ ଲୋକେ ଭକ୍ତିର ସହ ଗ୍ରହଣ କରିବେ I ଭୟହୀନ ଭକ୍ତିର କାରଣ I ଶୃଙ୍ଖଳା ପ୍ରତି ପ୍ରତ୍ୟେକଙ୍କର ସମ୍ମାନ ଥିବା ଦରକାର I କାରଣ ବିଶୃଙ୍ଖଳିତ ହୋଇ ଆମେ କେବେହେଲେ ସୁରକ୍ଷିତ ହୋଇ ପାରିବୁ ନାହିଁ I ସୁରକ୍ଷା ଆଉ ଶୃଙ୍ଖଳା ପରସ୍ପର ଅଙ୍ଗାଙ୍ଗୀ ଭାବରେ ଜଡ଼ିତ I ତେଣୁ ସୁରକ୍ଷା ନିୟମ ପ୍ରଣୟନ ଯଥେଷ୍ଟ ନୁହେଁ, ତାକୁ ପାଳନ କରିବା ପାଇଁ ଦରକାର ପଡିଲେ କଠୋର ଦଣ୍ଡର ମଧ୍ୟ ବ୍ୟବସ୍ଥା ରହିଥିବା ଦରକାର I

ଏହାହିଁ ସୁରକ୍ଷା ତ୍ରିକୋଣ ବା ସୁରକ୍ଷା ତ୍ରିଭୁଜର ବିସ୍ତୃତ ବିବରଣୀ I ସୁରକ୍ଷାହିଁ ଜୀବନର ପ୍ରଥମ ଆଉ ଶେଷ ଆବଶ୍ୟକତା I ଜୀବନର ପ୍ରତି ପଦକ୍ଷେପରେ ଆମକୁ ସୁରକ୍ଷା ନିୟମ ମାନିବାକୁ ପଡିବ I ପ୍ରତିଦିନ ଆମକୁ ଏହା ବିଷୟରେ ଚିନ୍ତା କରିବାକୁ ହେବ I ପ୍ରତିଦିନ ସୁରକ୍ଷା ଭାବଧାରାକୁ ଜାଗ୍ରତ ରଖିବା ପାଇଁ ତେଣୁକରି ଆମ ସଂମସ୍ତଙ୍କୁ ସବୁଜ ତ୍ରିକୋଣ କୁ ଆଖି ଆଗରେ ରଖି କାର୍ଯ୍ୟ କରିବାକୁ ହେବ I

- ଜୟ ସୁରକ୍ଷା -

ଭି.ଆଇ.ଏମ. - ୨୬୮

ଶୈଳଶ୍ରୀ ବିହାର

ଭୂବନେଶ୍ୱର - ୭୫୧୦୨୧

ମୋବାଇଲ - ୯୯୩୭୨୬୮୦୧୨