: ଦୀପକ ଷଡ଼ଙ୍ଗୀ

ବିଶ୍ବପ୍ରସିଦ୍ଧ ହାଇଦ୍ରାବାଦୀ ବିରିୟାନୀର ଇତିହାସ ବହୁ ପ୍ରାଚୀନ୤ ଶୁଣାଯାଏ ଯେ ନିଜାମଙ୍କ ଶାସନକାଳରେ ଯେତେବେଳେ ଔରଙ୍ଗଜେବ୍ ହାଇଦ୍ରାବାଦ ଆସିଥିଲେ ସେତେବେଳର ନିଜାମ୍ ନିଜା – ଉଲ - ମୁଲକ୍ ଔରଙ୍ଗଜେବଙ୍କୁ ଖୁସି କରିବା ପାଇଁ ଏକ ସ୍ବତନ୍ତ୍ର ଧାରଣର ଖାଦ୍ୟ ଯାହାକି ଭାତ ସହିତ ମାଂସ ଓ ମସଲାର ମିଶ୍ରଣକୁ ଏକ ସଂଗେ ପରଷି ଥିଲେ୤ ଯାହାକୁ କି ପରେ ବିରିୟାନୀ ନାମରେ ନାମିତ କରାଯାଇଛି୤ ଭାରତବର୍ଷରେ ମିଳୁଥିବା ପ୍ରାୟ ସମସ୍ତ ମସଲାର ଏକ ଅପୁର୍ବ ସମ୍ମିଶ୍ରଣ ହେଉଛି ଏହି ବିରିୟାନୀ୤ ତେବେ ଆସନ୍ତୁ ଏଇ ନୂଆବର୍ଷରେ ଆମ ଭାରତବର୍ଷର ଏକ ପୁରାତନ ଓ ସ୍ବାଦିଷ୍ଟ ବ୍ୟଞ୍ଜନକୁ ପ୍ରସ୍ତୁତ କରିବା୤

ହାଇଦ୍ରାବାଦରେ ପ୍ରସିଦ୍ଧ ବିରିୟାନୀ ମିଳୁଥିବା ହୋଟେଲ୍ ହେଉଛି ସିକନ୍ଦରାବାଦର ମହାତ୍ମା ଗାନ୍ଧି ରୋଡ଼ରେ ଥିବା ହୋଟେଲ୍ ପାରାଡାଇଜ୍ ଏବଂ ବାୱର୍ଚ୍ଚି ହୋଟେଲ୍୤ ଯଦିଓ ହାଇଦ୍ରାବାଦ ସହରରେ ବହୁତ ଗୁଡିଏ ବାୱର୍ଚ୍ଚି ହୋଟେଲ୍ ରହିଛି କେବଳ ଗ୍ରୀନ୍ ବା ରିଅଲ୍ ବାୱର୍ଚ୍ଚି ହିଁ ଆପଣଙ୍କର “ହାଇଦ୍ରାବାଦୀ ସ୍ପେସିଆଲ୍ ଦମ୍ ବିରିୟାନୀ” ମିଳିଥାଏ୤ ସୌଭାଗ୍ୟବଶତଃ ମୁଁ ହାଇଦ୍ରାବାଦ ଉପ୍ପଲର ‌‌ଯେଉଁ ଘରେ ଭଡା ରହୁଥିଲି ମୋର ଉପର ମହଲାରେ ପାରାଡାଇଜ୍ ହୋଟେଲର ଜଣେ ରୋଷେୟା ଶ୍ରୀ ଏମ୍ କ୍ରିଷ୍ଣା ମୁଥୟୖା ରହୁଥିଲେ୤ କିଛିଦିନର ମିଳାମିଶା ପରେ ମୁଁ ଥରେ ତାଙ୍କୁ ଅନୁରୋଧ କରିଥିଲି ଯେ ଆମକୁ ବିରିୟାନୀ କରିବା ଶିଖେଇ ଦିଅନ୍ତୁ ବୋଲି୤ ଆଉ ଦିନେ ସେ ରାଜି ହୋଇ ନିଜେ ଆମ ଘରକୁ ଆସି ପ୍ରସ୍ତୁତ କରି ଦେଇ ଯାଇଥିଲେ “ହାଇଦ୍ରାବାଦ ସ୍ପେସିଆଲ୍ ଦମ୍ ବିରିୟାନୀ”୤ ତାଙ୍କୁ ରୋଷେଇ କାର୍ଯ୍ୟରେ ସାହାଯ୍ୟ କରିଥିଲୁ ମୁଁ ଏବଂ ମୋର ଧର୍ମପତ୍ନୀ ଜ୍ୟୋତିର୍ମୟୀ୤

ଆବଶ୍ୟକୀୟ ସାମଗ୍ରୀ (୩ ରୁ ୪ ଜଣଙ୍କ ପାଇଁ )

ବସୁମତୀ ଅରୁଆ ଚାଉଳ - (ଇଣ୍ଡିଆ ଗେଟ କିମ୍ବା ବେଷ୍ଟ ରାଇସ୍ ହୋଇଥିଲେ ଭଲ) – ୭୫୦ଗ୍ରାମ, ଫୁଲ କୋବି - ୧ଟା, ଗାଜର - ୨/୩ଟା, କ୍ୟାପସିକମ – ୨/୩ଟା, ବିନ – ୧୦୦ଗ୍ରାମ, ମଟର ଛୁଇଁ – ୫୦ଗ୍ରାମ, ଆଳୁ – ୩ଟା, ପୋଦିନା ପତ୍ର – ୧ ବିଡା, ଧନିଆ ପତ୍ର – ୧ ବିଡା, ବିଲାତି ବାଇଗଣ – ୩ଟା, ଅଦା – ୩/୪ଖଣ୍ଡ, କଟା ପିଆଜ – ୨ଟା, ରସୁଣ – ୪/୫ଟି, ଜୀରା – ୧ ଚାମଚ, ଧନିଆ ଗୁଣ୍ଡ - ୧ ଚାମଚ,ହଳଦୀ ଗୁଣ୍ଡ - ୧ ଚାମଚ, ଲଙ୍କା ଗୁଣ୍ଡ - ୧ ଚାମଚ, ଡାଲଚିନି -୩/୪ଖଣ୍ଡ, ବଡ ଅଳେଇଚ – ୧ଟା, ଜାଇଫଳ – ୧ଟା , ଲବଙ୍ଗ-୪/୫ ଟି,ଗୁଜୁରାତି – ୨/୩ଟି, ତେଜପତ୍ର -୨/୩ଟି, ଗୋଲ ମରିଚ – ୧ଗ୍ରାମ, ହେଙ୍ଗୁ – ଅଳ୍ପ, କାଜୁ - ୭/୮ ଟି, କିସମିସ- ୭/୮ ଟି, କେଶର –ଅଳ୍ପ(ପାଣିରେ ରାତିରୁ ଭିଜା ହୋଇ ଥିବା ଦରକାର ରଙ୍ଗ ପାଇଁ ଆବଶ୍ୟକ ), ଦହି – ୧୦୦ମିଲି, ଦେଶୀ ଘିଅ – ୪/୫ ଚାମଚ, ତେଲ (ଆବଶ୍ୟକ ଅନୁଯାୟୀ), ଲୁଣ (ଆବଶ୍ୟକ ଅନୁଯାୟୀ) ୤

ତିଆରି କରିବା ପ୍ରଣାଳୀ

ପ୍ରଥମେ ଏକ ପାତ୍ରରେ ୧ ଲିଟର ପାଖାପାଖି ପାଣି ଗରମ କରି ନିଅନ୍ତୁ୤ ପାଣି ଫୁଟିଲା ପରେ ସେଥିରେ ତେଜପତ୍ର, ଲବଙ୍ଗ, ଡାଲଚିନି, ଅଳେଇଚ ପକାଇ ଦିଅନ୍ତୁ୤

ବିରିୟାନୀ ଚାଉଳକୁ ପକାନ୍ତୁ ଓ ତା ସହିତ ଏକ ଛୋଟ ଚାମଚ ଦେଶୀ ଘିଅ ମଧ୍ୟ ପକାନ୍ତୁ ଦେଶୀ ଘିଅ ପକାଇବା ଦ୍ବାରା ଭାତ ଗୁଡିକ ଗୋଟା ଗୋଟା ହୋଇ ରହିବ ଯାଉ ପରି ହୋଇ ଯିବନାହିଁ୤

ମଝିରେ ମଝିରେ ତାକୁ ଗୋଳାଉ ଥାଆନ୍ତୁ୤ ଏହି ସୋପାନଟି ହେଉଛି ବିରିଆନୀର ମୁଖ୍ୟ ସୋପାନ କାରଣ ଚାଉଳକୁ ପୁରା ଭାତ ହେଲା ପରି କରାଯିବ ନାହିଁ ପାଖାପାଖି ୭୦% ଭାତ ହୋଇ ଆସିବା ପରେ ଆମେ ତାକୁ ଚୁଲିରୁ ଓହ୍ଲାଇଦେବା କାରଣ ଏହି ଭାତକୁ ପରେ ପ୍ରେସର କୁକର ସାହାଯ୍ୟରେ ଦମ ଦିଆଯିବ୤

ଭାତ ଓହ୍ଲାଇ ସାରିବା ପରେ ସେଥିରୁ ତେଜ ପତ୍ର, ଅଲେଇଚ ଆଦି ସବୁ ବାହାର କରି ଅଲଗା କରି ଦିଅନ୍ତୁ୤

ଅପର ପାର୍ଶ୍ବରେ ଆଳୁରୁ ଚୋପା ଛଡେଇ ଦିଅନ୍ତୁ ଏବଂ ସମସ୍ତ ପରିବାକୁ ଛୋଟ ଛୋଟ କରି କାଟି ରଖନ୍ତୁ୤

ଏବେ କଡେଇରେ ତେଲ ଗରମ କରନ୍ତୁ ତା’ପରେ ପ୍ରଥମେ ଆଳୁକୁ ତେଲରେ ଛାଣି ଅଲଗା ରଖନ୍ତୁ ପରେ ପରେ ସବୁ ପରିବାକୁ ସେହିପରି ତେଲରେ ଛାଣି ରଖନ୍ତୁ୤ ବେଶୀ ମଧ୍ୟ ଭାଜିବେ ନାହିଁ ଅଳ୍ପ ବାଦାମି ରଙ୍ଗର ହୋଇଗଲେ ପରିବାକୁ କଡେଇରୁ ବାହାର କରି ଦିଅନ୍ତୁ୤

ମସଲା ପ୍ରସ୍ତୁତି

କଟା ବିଲାତି, ପିଆଜ, ଅଦା, ରସୁଣ, ଜୀରା ଓ ଅଳ୍ପ କିଛି ଶୁଖିଲା ଲଙ୍କା ସହ ପାଣି ଦେଇ ଏହାକୁ ଭଲ କରି ଗ୍ରାଇଣ୍ଡରରେ ବାଟି ଦିଅନ୍ତୁ୤

କଡେଇରେ ତେଲ ଗରମ କରନ୍ତୁ ଉପରୋକ୍ତ ମିଶ୍ରଣକୁ ତେଲରେ ପକାନ୍ତୁ ଓ ତା ସହ ହେଙ୍ଗୁ, ହଳଦୀ ଗୁଣ୍ଡ, ଧନିଆ ଗୁଣ୍ଡ, ଲଙ୍କା ଗୁଣ୍ଡ ପକାଇ ଭଲ କରି ଭାଜି ନିଅନ୍ତୁ୤

ସମସ୍ତ ଶୁଖିଲା ମସଲା ଯେପରି ଲବଙ୍ଗ, ଡାଳଚିନି, ଅଳେଇଚ ଗୁଜୁରାତି, ଗୋଲମରୀଚ, ଜାଇଫଳକୁ ଭଲ କରି ହେମଦସ୍ତାରେ ଗୁଣ୍ଡ କରି ନିଅନ୍ତୁ ଏବଂ ଏହି ମସଲାକୁ ଉପୋରକ୍ତ ମସଲାରେ ପକାଇ ଦିଅନ୍ତୁ ୤

ଏହି ମସଲା ପକେଇବା ମାତ୍ରେ ମସଲାରୁ ଅପୂର୍ବ ସୁଗନ୍ଧ ବାହାରିବ ଯାହା ଆପଣଙ୍କ ସାଇ ପଡିଶାକୁ ଜଣେଇ ଦେବ ଯେ ଆଜି ଆପଣ ଙ୍କର ଘରେ ବିରିୟାନୀ ପ୍ରସ୍ତୁତି ଚାଲିଛି୤

ତା'ପରେ ସେହି ମସଲାରେ ଦହି ପକାଇ ଦେଇ ସେ ପର୍ଯ୍ୟନ୍ତ ଗୋଳାନ୍ତୁ ଯେଉଁ ପର୍ଯ୍ୟନ୍ତ ସେଥିରୁ ତେଲ ଅଲଗା ନ ହୋଇଛି୤

ବର୍ତମାନ ଉପୋରକ୍ତ ମସଲାରେ ଆଗରୁ ଛଣା ହୋଇ ରଖା ହୋଇଥିବା ସମସ୍ତ ପରିବାକୁ ଏକ ସାଙ୍ଗରେ ପକାଇ ଭଲ କରି ଗୋଳାଇ ଦିଅନ୍ତୁ ଏବଂ ୨ ରୁ ୩ ମିନିଟ ପର୍ଯ୍ୟନ୍ତ ଘୋଡାଇ ରଖି ତାକୁ ସିଝିବାକୁ ଛାଡି ଦିଅନ୍ତୁ ୤ (ଯଦି ଆପଣ ମାଂସ ପ୍ରିୟ ତେବେ ଏହି ସୋପାନରେ ଆଗରୁ ସିଝା ହୋଇ ରଖା ହୋଇଥିବା ଛେଳି କିମ୍ବା କୁକୁଡା ମାଂସକୁ ପକାନ୍ତୁ ) ପରେ ମସଲାକୁ ଚୁଲିରୁ ଓଲହାଇ ଦିଅନ୍ତୁ ବର୍ତ୍ତମାନ ଆମର ବିରିୟାନୀ ମସଲା ପ୍ରସ୍ତୁତ ୤

ଆମେ ବର୍ତ୍ତମାନ ଭାତ ଓ ମସଲାକୁ ପ୍ରେସର କୁକର ରେ ଦମ୍ ଦେବା୤ ସେଥିପାଇଁ ଏକ ୫ଲିଟରର ପ୍ରେସର କୁକର ନେବା ଏବଂ ତା ମଧ୍ୟରେ ପ୍ରଥମେ କିଛି ଘିଅ ପକାଇ ତା’ର ଚାରି କଡରେ ଭଲ କରି ମାଖି ଦେବା୤ ତା’ପରେ ବିରିୟାନୀ ଭାତର ଏକ ପରସ୍ତ ଦେବା ଓ ତା ଉପରେ ମସଲାର ମଧ୍ୟ ଏକ ପରସ୍ତ ଦେବା ଏହିପରି ଭାବେ ଭାତ ଓ ମସଲାକୁ ୪ କିମ୍ବା ୫ ପରସ୍ତ ପରସ୍ତ କରି ତା ଭିତରେ ରଖିଦେବା ୤

ଭାତ ଓ ମସଲା ଶେଷ ହୋଇଗଲା ପରେ ତା ଉପରେ କାଜୁ, କିସ୍‌ମିସ୍, ଧନୀଆ ପତ୍ର, କେସର ଓ ପୋଦିନା ପତ୍ର ସହ ୨/୩ ଚାମଚ ଘିଅ ଦେଇ ପ୍ରେସର କୁକରର ଢାଙ୍କୁଣୀର ହୁଇସିଲକୁ କାଢି ବିନା ହୁଇସିଲରେ ପ୍ରେସର କୁକରକୁ ବନ୍ଦ କରିଦେବା ଏବଂ ଏହାକୁ ପ୍ରାୟ ୧୫ ମିନିଟ ପର୍ଯ୍ୟନ୍ତ ଧିମା ଆଞ୍ଚରେ ଦମ୍ ଦେବାକୁ ଛାଡି ଦେବା୤

ଠିକ ୧୫ ମିନିଟ୍ ପରେ ଗ୍ୟାସ୍ ବନ୍ଦ କରି ବିରିୟାନୀକୁ ଭଲ ଭାବେ କୁକର ଭିତରେ ଗୋଳାଇ ଦେବା୤ ଏବେ ହୋଇଗଲା ପ୍ରସ୍ତୁତ ଗରମା ଗରମ ‘ହାଇଦ୍ରାବାଦ ସ୍ପେସିଆଲ୍ ଦମ୍ ବିରିୟାନୀ’୤ ଯଦି ବିରିୟାନୀକୁ ସଜେଇବାର ଥାଏ ତେବେ ପିଆଜକୁ ଗୋଲ ଗୋଲ କରି କାଟି ପୋଦିନା ଓ ଧନିଆ ପତ୍ର ସହ ସଜେଇ ନିଜେ ଖାଆନ୍ତୁ ଓ ନିଜର ପ୍ରିୟଜନଙ୍କୁ ମଧ୍ୟ ଖୁଆନ୍ତୁ୤ ଆଉ ହଁ ! ନୂଆବର୍ଷରେ ବିରିୟାନୀ ଖାଇବା ଓ ଖୁଆଇବାର ମଜାକୁ ଆମ ହ୍ବାଟ୍‌ସଆପ୍ ଆପ୍ ଗ୍ରୁପରେ ନିଶ୍ଚିତ ବାଣ୍ଟନ୍ତୁ୤

ସହକାରୀ ଅଧ୍ୟାପକ, ରୋଲାଣ୍ଡ୍ ଫାର୍ମାସୀ ମହାବିଦ୍ୟାଳୟ

ଖୋଡାସିଙ୍ଗୀ, ବ୍ରହ୍ମପୁର-୧୦