: ମନୋରଞ୍ଜନ ମୁଦୁଲି

ଖୋଜି ପାଉନାହିଁ ମାଟି ଘର ଝୋଟି ଅଗଣାରେ ବରକୋଳି,

ପୋଖରୀ ହୁଡାର ବର ଓହଳରେ ଖେଳୁଥିଲୁ କେତେ ଦୋଳି ।

ଆମ୍ବ ତୋଟା ନାଳ ପାରିହେଲେ ଦିଶେ ନାଲି ନାଲି କେତେ ବଇଁଚ କୋଳି,

ଆମ ଗାଁ ମୁଣ୍ଡ ପଧାନ ବାଡିରୁ ତୋଳୁଥିଲୁ କେତେ କଞ୍ଚା ତେନ୍ତୁଳି ।

ଖୁଦୁରୁକୁଣୀ ଓଷା କରୁଥିଲା ଉମା ମାଉସୀ ର ସାନ ଭଉଣୀ,

କଇଁଫୁଲ କେତେ ତୋଳି ଦେଉଥିଲୁ ପହଁରି ପହଁରି ଗାଁ ପୋଖରୀ ।

ରଘୁଆ କୁମ୍ଭାର ଦୀପ ଆଣିଦିଏ ଦୀପାବଳି ଆଉ ଜାଗରେ ପୁଣି,

ଶମ୍ଭୁ ବାରିକ ଦଶ’ରା ସକାଳେ ଦେଖାଉ ଥିଲା ତା ଦର୍ପଣ ଆଣି ।

ନିଧି ନନା ଆସେ ଗହ୍ମାପୁନେଇଁରେ ପଇତା ସାଙ୍ଗରେ ରାକ୍ଷୀକୁ ନେଇ,

ଯଜମାନ ହାତେ ବାନ୍ଧି ଦେଉଥିଲା ଆଶୀର୍ବାଦ କେତେ ମନ୍ତର ଗାଇ ।

ଚକୁଳିଆ ପଣ୍ଡା ଗୀତ ଗାଉଥିଲା ଗାଁ ଦାଣ୍ଡେ ଧର୍ମ କାହାଣୀ ଗାଇ,

ବୁଢ଼ୀ ମାଆ ମାନେ ଚାଉଳ ପରିବା ଦେଉଥିଲେ ଆଣି ଭୋଜନ ପାଇଁ।

ରଜ ସଂକ୍ରାନ୍ତି ରେ ପୋଡ଼ପିଠା ପାନ ମକର ଚାଉଳ ଭୋଜି,

ଗହ୍ମାପୁନେଇଁ ର ମଣ୍ଡା ଚକୁଳି ଖୋଜିଲେ ମିଳୁନି ଆଜି।

ହଜିତ ଯାଇଛି ଶୈଶବ ମୋଅର ସମୟ ସୁଅରେ ଆଜି,

ସାଇତି ରଖଛି ହଜିଲା ଅତୀତ ସ୍ମୃତିରେ ରହିଛି ଆଜି।